लोकजीवन

मौजे सुकेणे हे गाव कृषीप्रधान आणि प्रगतशील जीवनशैलीसाठी ओळखले जाते. शेती हा गावकऱ्यांचा मुख्य व्यवसाय असून द्राक्ष,कांदा, मका,गहू,टमाटे,बाजरी व हंगामी भाजीपाला यांसारखी पिके घेतली जातात. विशेषतःद्राक्ष, ऊस, टमाटे व कांदा या पिकांमुळे गावातील शेतकऱ्यांना चांगले उत्पन्न मिळते.शेती व्यतिरिक्त काही शेतकरी दुग्धव्यवसाय, कुक्कुटपालन तसेच लहान-मोठ्या उद्योगांमध्येही कार्यरत आहेत.

गावात सामाजिक, सांस्कृतिक आणि धार्मिक परंपरा आजही दृढपणे जपल्या जातात. वर्षभर साजरे होणारे उत्सव, ग्रामदैवतांची पूजाअर्चा आणि स्थानिक जत्रा हे गावाच्या एकात्मतेचे प्रतीक मानले जाते. गणेशोत्सव, नवरात्र, होळी, दिवाळी यांसोबतच स्थानिक देवतांच्या जत्रांना विशेष महत्त्व आहे.

येथील लोक मेहनती, सहकार्यशील आणि “अतिथी देवो भव” या मूल्यांना आचरणात आणणारे आहेत. ग्रामविकासात लोकसहभाग मोठ्या प्रमाणात जाणवतो. महिलांचा सहभाग स्वयं-सहाय्यता गटांद्वारे प्रभावीपणे दिसून येतो, तर तरुण पिढी शिक्षण, खेळ व नोकरीच्या संधी शोधून प्रगतीकडे वाटचाल करत आहे.

मौजे सुकेणेच्या लोकजीवनात पारंपरिक ग्रामीण संस्कृतीसोबत आधुनिकतेचा स्पर्शही आढळतो. त्यामुळे गाव विकास, परंपरा आणि एकतेचा उत्तम संगम घडवित आहे.

प्रेक्षणीय स्थळे

• 🛕 ग्रामदैवताचे मंदिर – दत्त मंदिर

मौजे सुकेणे गावातील दत्त मंदिर हे प्राचीन असे मंदिर असुन ग्रामदैवताचे प्रमुख श्रद्धास्थान आहे. महानुभाव पंथीयांसाठी हे एक ऐतिहासिक व पवित्र तीर्थक्षेत्र मानले जाते. येथे दरवर्षी दत्त जयंती व पालखी सोहळा मोठ्या उत्साहात साजरा केला जातो. देशभरातून भाविक या यात्रेत सहभागी होतात. हे मंदिर गावकऱ्यांच्या सामाजिक व सांस्कृतिक एकतेचे प्रतीक मानले जाते.

• 🛕 हनुमान मंदिर

गावाच्या मध्यवर्ती भागात असलेले हनुमान मंदिर हे ग्रामस्थांचे अखंड श्रद्धास्थान आहे. हनुमान जयंतीला येथे धार्मिक वातावरणात विविध कार्यक्रमांचे आयोजन केले जाते. तसेच आठवडी भजन, सप्ताह व इतर धार्मिक कार्यक्रमही मोठ्या भक्तिभावाने पार पाडले जातात. सण-उत्सवांच्या काळात हे मंदिर ग्रामस्थांच्या एकत्र येण्याचे व संवाद साधण्याचे केंद्रस्थान ठरते.

• 🛕 बानेश्वर महादेव मंदीर 

गावात एक प्रसिद्ध असे हे महादेव मंदिर आहे जे भाविकांचे एक खूप मोठे श्रद्धा स्थान आहे. ग्रामस्थ दर वर्षी महाशिवरात्रीचा दिवस सोहळ्या प्रमाणे साजरा करता. पंचक्रोशीत हे मंदिर  अतिशय प्रसिद्ध आहे.

• 🌾 शेती क्षेत्र

मौजे-सुकेणे हे कृषिप्रधान गाव असून शेती हा येथील ग्रामजीवनाचा मुख्य आधार आहे. गावात मोठ्या प्रमाणावर द्राक्ष, कांदा, मका, गहू व हंगामी भाज्या यांची लागवड केली जाते. हिरवीगार द्राक्षबागा व कांद्याच्या शेतीमुळे परिसराला एक वेगळेच सौंदर्य लाभले आहे. गावातील अनेक शेतकरी फळे व भाजीपाला बाजारात पुरवून आर्थिक प्रगती साधत आहेत.

• 💧 जलसंधारण प्रकल्प

गावात जलसंधारण व पाणलोट क्षेत्र विकासावर विशेष भर देण्यात आला आहे. यामुळे शेतीला वर्षभर पाणी उपलब्ध होत असून गावाच्या हरितरूपात वाढ झाली आहे. गावात बाणगंगा नदीवर बंधारे बांधण्यात आले आहेत जे शेतीला कालवा, विहीर, बोरवेल द्वारे सिंचन केले जाते. सिंचनासाठी ठिबक सिंचन,तुषार सिंचन याचे मोठ्या प्रमाणावर वापर केला जातो.